呢排商場劏舖熱爆，尖沙嘴百樂酒店基座DNA商場改名做「首都廣場」，劏成600個蚊型舖賣，入場費300萬，噚日中原同美聯兩大地產代理竟然大搞千人誓師會，可以話係近年工商舖市場首見。
更特別係，誓師會上有超過一半係做開住宅嘅代理，佢哋仲要聽得好鬼專心。其實同一時段，恒地（012）為咗賣九龍城單幢新盤曉薈，都搞緊個誓師會，但聽聞好多住宅代理冇去，反而走去準備賣舖。
鬼咩，自從政府舊年推出加強版額外花稅（SSD）同買家印花稅（BSD）打擊樓市之後，一班專做住宅嘅代理已經叫苦連天，雖然未至於完全冇成交，但就肯定唔係個個代理有單開。相反，唔受措施束縛嘅舖位就炒到㷫烚烚，住宅代理為咗開飯，惟有不務正業啦。
李華華