家陣差唔多人人有一部智能手機，有新型號出就要趕住換機或者轉月費計劃，除咗蘋果、三星，最受惠嘅一定係電訊商，佢哋老闆今年應該加多啲人工畀班夥計以示鼓勵啦。聽聞超人李嘉誠旗下和電香港（215）今年加人工加得唔錯，3香港員工平均加幅有3至8%，個別表現出眾嘅，加幅仲有雙位數𠻹
數碼通玩神秘
至於另外兩間上市電訊商香港電訊（6823）同數碼通（315），前者一向都係3、4月先宣佈薪酬檢討，後者今年就玩神秘，好似話總裁黎大鈞唔想咁揚喎。黎總向來寸嘴，唔肯講加幾多，唔通加得太少，唔見得人定還是加得太多，怕股東鬧呢？條數總會喺年報反映㗎喎，使乜咁神秘呢？
李華華