新年伊始，歐洲轉會窗又重開。很多球會都急需新球員，但同時亦有不少球員急住要走，第一個係國際米蘭的史奈達。
話晒係國米09年三冠王功臣，史奈達在國米「收尾幾年」竟落得如此下場：被要求減人工不止，還遭雪藏，再打包踢走，相信令不少國米fans非常不滿！睇番國米奪得班主莫拉堤任內首屆聯賽冠軍的陣容，如今只有甘比亞素同辛尼迪兩個仍然留低（編按：還有史坦高域和森美爾），莫拉堤有幾重人情，不言而喻。
除盛傳的熱刺，曼聯、利物浦甚至AC都傳對該位荷蘭指揮官有興趣。我認為曼聯的傳聞最無謂。雖說費Sir一直賞識史奈達，但今季已有新兵香川真司踢同一位置；另一新兵尹佩斯，甚至朗尼亦曾被費Sir安排踢進攻中場而收效唔錯，何需買史奈達回來，搞出人滿之患？
至於熱刺，求購史奈達當然希望複製另一荷蘭名將雲達華治在球隊的成功案例。不過我亦認為他最佳去處不是熱刺，而是AC米蘭！所謂你不仁，我不義，有甚麼比轉投同市宿敵，並有更上一層樓的表現，最能令國米落面？加上史奈達太太表明希望留在米蘭這個時裝之都，相信熱刺一日未簽實，史奈達仍有機會投AC。
至於最急於增兵的球隊，看來非英超的昆士柏流浪莫屬。哈利列納最愛陣中置一名高大、打法直接的中鋒（如跟隨多年的高治），在安祖莊臣及森莫亞持續養傷下，看來QPR這趟荷包是唔慳得。