十二月二十七日本欄寫皇后大道東，當日下午就接到當紅大賓架Ｌ先生來電：「嘩，乜咁捧場呀，寫到我母校咁出眾，多謝晒！」即刻問佢：「你係曾蔭權嗰間定是李柱銘嗰邊？」賓架Ｌ答：「華仁一心一夢一家，無分彼此，我唔熟皇后大道東。」
記得余叔韶在自傳「雪廠街7號」所述，香港華仁書院耶穌會神甫嘅教學方式，對佢影響殊深，令佢終身難忘。聽賓架Ｌ講番佢中學時一段小故事，原來佢若無九龍華仁一位老師Father Reid打救，佢亦無今日，所以袁天凡叫佢支持華仁籌旗之時，佢當然一口應承，但出錢支持最力者，就係六九年畢業嘅邢李㷧，一出手就捐二千萬，故此音樂會「譚校長&譚校長」籌款成績非常滿意，「華仁一家基金」已籌到過億元，港華九華堅持不轉為直資學校，推行小班教學，係有資源支撐嘅！
話說賓架Ｌ中學會考只得一科良，不能返回九華讀預科，感到絕望要去九龍新法撲中六學位，點知突然收到學校通知，話一位成績好但家貧嘅同學因要去打工（當年英中會考畢業生搵工好易，華仁仔仲易）幫輕父親負擔，退學不讀，可以收番賓架Ｌ，原因係賓架Ｌ嘅課外活動出色，神甫願意俾個機會佢，佢大喜過望，衝番去九華註冊，但自認生性疏懶；讀書甚少，中六上學期成績不振，某日與三位同學在學校附近一間士多打麻將，俾老師行過，捉到正，四位學生面都青晒，次日Father Reid召見賓架Ｌ一人，嚴厲指摘佢不長進之餘，最後對佢講：「你嗰三位打麻將同學，家境富裕成績好，已有美國大學取錄，所以讀書係咁意，我地費事理會，唯獨你屋企家境麻麻，父母供你讀書捱得辛苦，你仲唔識得奮發上進，走去打麻將，識唔識醜！」賓架Ｌ為之羞愧到無地自容，以為會被趕出校或記大過，點知Father Reid對佢之懲罰，就係每日在學校碰頭一次就問書一次，嚇到賓架Ｌ拚命讀書，卒之在中七憑高考成績入咗港大社會科學院，畢業後加入銀行界，逐步攀升至頂峯！（按：後有華仁校友提供資料，Father Reid係耶穌會著名教育家，享國際聲譽。）