狼英死口唔認錯，明明大肆僭建，都話自己冇喎，當局仲幫拖放軟手腳唔徹底調查，完全教壞細路啦！好似唔夠30歲嘅民主黨麥潤培（圖）咁吖，佢就好學唔學，噚日竟然將自己嘅男人胸，僭建咗做對女人胸，仲要戴埋對Hello Kitty Bra，喺遊行期間大騷事業線。化身香艷女郎嘅麥潤培講明，有狼英珠玉在前，就算任何人點問，自己都唔會認有對僭建胸：「因為係梁振英教我嘅！」
佢嘅黨友鄺美娜唔弱，化身巫婆上街，揸住毒蘋果遊行，唔係鬧《蘋果》，而係鬧爆個問題多多嘅特惠生果金，批評狼英死都唔放過啲老人家，堅持要審查佢哋嘅棺材本。