華華早幾個月前都寫過，話冒牌花旗職員要趁年尾跑數，今次到冒牌金管局總裁陳德霖出嚟跑數。呢位自稱「Norman Chan, Tak-Lam, S.B.S., J.P」嘅人，竟然寄封email嚟《蘋果日報》，話有單價值4710萬美金嘅生意同我哋傾，睇嚟呢位「攞命陳」真係好等錢使，竟然搵到嚟報館。
今次呢位「陳德霖」用嘅手法都幾低B，話要我哋幫佢手搞個project，係由香港「去你哋嘅國家」，乜「陳德霖」唔知敝報就喺香港㗎咩？佢叫我哋回覆佢嘅私人email，電郵地址係[email protected]，估唔到「陳德霖」都用QQ。
相信大家成日都收到乜乜銀行打嚟叫你借錢，有啲其實係借機套你嘅個人資料。至於「陳德霖」想點樣呃人華華就未清楚，睇嚟都係想氹啲外國大款落疊；如果大家收到呢位「攞命陳」嘅邀請，應該考慮報警。