那邊廂，港產珠寶設計師陳瑞麟打着宏揚中國傳統文化的旗幟，創立品牌Qeelin，設計葫蘆、熊貓及舞獅等中國風首飾，上月獲Gucci母公司看中收購，揚威國際；這邊廂，80後港產設計師葉宣恒（Ronno），節衣縮食打工賺錢支撐創業夢，一年賠掉50萬元積蓄，將心愛零食雞蛋仔、蛋撻、砵仔糕及菠蘿包設計成香港風首飾，就為了告訴世界，真正的香港小食是何模樣。
還原小食原始形象
Ronno入行10年，贏過不少設計比賽，去年7月再獲國際有色寶石協會舉辦的寶石首飾設計比賽冠軍。他一年前成立「香港猿創」品牌，設計一系列港式小吃首飾，「我最想設計一樣屬於香港嘅嘢，好似雞蛋仔、蛋撻咁，呢啲香港小食每日都有機會接觸到，係香港特色」。
時代變遷，港式風味逐漸消退，「社會發展令好多嘢都改變咗，街邊檔越嚟越少，好多小食搬晒入舖頭，好似家嘅砵仔糕係用保鮮紙、膠袋包住，但我哋細個見到嘅砵仔榚，係啲婆婆喺街邊用個碗裝住，新鮮熱辣咁整出嚟，呢啲情景好難再喺街邊見到，所以我想設計番最原始嘅形象出嚟，勾起香港人嘅童年回憶」。
單單研究賣相，Ronno便花了約四個月做資料搜集，首要講究像真度，「砵仔糕有兩支竹籤篤住，我仲專登整番個可以拆除嘅碗托底、雞蛋仔要入落個袋袋住」。
生意慘淡蝕足一年
Ronno過去一年花了50萬元積蓄，設計及聘請工廠製辦，去年中曾到旺角及尖沙嘴等區尋舖開店，卻被天價租金嚇退，「試過睇中兩間只係500呎左右嘅樓上舖，租金都要去到兩至三萬，我諗咗唔到兩星期，打番畀個地產經紀，一間租出咗，另一間就要求加租15%」。他最終只能將成品放在網上出售。
至三個月前，小吃系列進駐貿發局旗下專售本土品牌的香港設計廊專櫃後，生意稍為好轉，每月營業額一萬元，但離收支平衡還有一大段距離。
雖然蝕足一年，但Ronno未曾想過放棄，「我明白做一個品牌條路係好艱難，往往需要最少五至六年時間等個品牌成熟」。
Ronno批評本土設計師欠平台宣傳，難以出頭，「好似?觀塘區同火炭區都有啲工廠活化計劃，租啲地方做工場或舖頭，但好少人知；喺旅遊發展局都搵唔到有宣傳冊子話畀遊客聽邊度有啲乜嘢睇，但好似澳門，旅遊諮詢處會列明邊啲地方會有啲乜?獨特組織、藝術團體，介紹畀旅客」。
記者：趙琦