【元旦遊行】
【本報訊】財政預算案與施政報告是社會發展藍圖，參與遊行的市民都有夢，夢想這兩份報告能繪出一個更美好的城市，能扭轉地產霸權、貧富懸殊殘局，更希望香港快踏普選路；可惜，兩份報告都出自一個欠誠信的特首，市民不抱期望，只好相信一切「絕對是個夢」，「大話精講咗會做乜？派錢都冇人會再信佢」。
記者：翁煜雄 蔡建豪 莫劍弦
梁振英政府首份財政預算案下月公佈，「梗係想佢派錢啦，每人派一萬蚊，幫到市民，好過政府亂咁用」。在東涌志願團體當幹事的阿偉說，政府每推政策都未能解市民之急，何不索性再派錢，因許多貧窮市民均活在水深火熱中，「明天會更好，但今天過唔到嘛」。
貧富更加懸殊
不過，更多市民不表認同。40多歲出入口商人謝先生認為，公帑要用得其所，接濟真正有需要人士，「唔可以係人都派」，尤其在政府縱容地產等霸權下，社會貧富更懸殊，「尤其係長者，應該畀佢哋退休金，有尊嚴咁生活」。任文員的梁小姐也認為，「呢個政府咁冇民望，真係派錢都冇用，冇人會再信佢哋」。
施政報告是社會的發展藍圖，20歲副學士二年級學生鄭小姐，期望政府能放寬審批學生資助，「家每次申請都好似審犯咁」。文員梁小姐期望定立標準工時，讓打工仔擁有工作外的生活。50歲出入口商人馮先生，像許多升斗市民般只想安居樂業，「家房屋政策淨係傾向幫地產商，連個乜置安心，最終只係推高青衣區樓價」。
「不過，我哋期望有乜用？呢個政府信得過咩？」馮先生說起有點氣憤，指梁振英常大話連篇，連政策也只是「口號式」，沒實際執行，就如打擊北區水貨客也只是做騷一場，「我成日搭火車返內地，水貨客家咪一樣日日塞喺北區」。
「完全打橫嚟」
IT人KK自小已關心政治民生，奈何已對施政報告不抱任何期望，因梁振英「做到特首已經係悲劇」，而且上任半年來政策更叫人心寒，例如本應可循法院解決的外傭居港問題，也動輒要求人大釋法，「佢完全打橫嚟，我哋仲可以期望啲乜？我期望民主選舉，佢可以畀我乜？」
許多市民都像KK般期望當局盡快為普選鋪路，其實都只為「以子之矛，攻子之盾」，「只要我哋有普選，就可鏟除好似梁振英咁嘅行騙長官啦！」文員郭小姐及退休公務員黃先生均認為，港人今日仍要「硬食」一個欠誠信的特首，便是因特首由小圈子選出來，因此期望政府盡快落實普選路線，2017年可一人一票選出心中特首，「但咁會唔會係與虎謀皮？你話市民幾無奈吖。」
