舊年上市嘅太古地產（1972），新近搵咗利豐（494）榮譽主席馮國經位公子馮裕鈞做獨立非常務董事。
馮公子加入太古地產董事局嘅即時效應，就係拉低晒董事局嘅平均年齡，皆因佢現年只係39歲，而現時太地董事局入面唯一一位三字頭嘅董事，就係嚟自大股東施懷雅家族嘅非常務董事施銘倫（Merlin Bingham Swire），今年同樣39歲。
睇返履歷，馮裕鈞28歲時就已經入咗利豐做歐洲業務總裁，08年入埋利豐董事局，舊年年中升做營運總監，喺新一年佢連地產都撈埋，但馮氏家族私人有唔少零售業務，都租咗太古嘅場，睇嚟真係可以好獨立咁俾啲意見噃！