踏入2013年，唐牛祝戰友們股運亨通，出入平安。Buy and Hold策略舊年成功復活，今年環球繼續水浸，以股市為首嘅資產市場越炒越旺，落後股勢成熱錢焦點，今日推介舊年冇升過嘅工業股震雄集團（057），中線有力做倍升股。
截至9月底，震雄半年賺5604萬銀，按年減少46%，睇真啲，原來舊年因人仔升值錄得滙兌收益，令比較基數大咗，撇除呢個因素，盈利按年僅跌5%。事實上，集團毛利率由23.8%擴闊至24.9%，最值錢地方係底子夠厚，每股NAV達4.50元，以現價2.34元計，PB僅0.52倍，比起龍頭海天國際（1882）嘅3倍，折讓幅度高達83%，平到離晒譜。隨着內地經濟回暖，加上以美國為首嘅海外生意顯著增長，震雄注塑機業務有力谷底反彈。
震雄上周五收報2.34元，全年計不升反跌3%，落後得過份，近期突破圓底頸線，成功築底，以PB 0.7倍作目標，可見3.45元，中線上望NAV價，升幅有近一倍。
唐牛