喺英超踢得好，去到西甲又會唔會成功呢？睇嚟唔單止唔成功，仲好可能掉番轉，由天堂跌入地獄㖭！莫迪歷過去幾季喺英超呼風喚雨，舊年夏天加盟皇家馬德里，結果表現麻麻，仲俾球迷選為舊年西甲嘅最差收購！喺阿仙奴成名、上年加盟巴塞嘅桑治就緊隨其後成第2差收購。
西班牙《馬卡報》喺上年年尾做咗個調查，叫球迷總結全年，選出心目中各項年度最佳同最差；其中最差收購嘅結果，令唔少英超粉絲震驚，因為頭兩位都喺去年夏天由英超轉投西甲。以4,500萬歐元（約4.6億港元）高價由熱刺加盟皇馬嘅莫迪歷，得到32.2%球迷嘅「支持」，被選為2012年嘅西甲最差收購。
莫迪歷喺皇馬半季，未能動搖奧斯爾同沙比阿朗素嘅正選，上陣22次，入球同助攻各得1個咁大把，可以話冇建樹咁滯，再睇埋個身價，真係難怪眾望所歸！莫迪歷話：「喺皇馬，每宗轉會要面對嘅傳媒壓力，係好大㗎。我唔係搵藉口幫自己開脫，我有時嘅表現好好，當然亦有唔好嘅時間，但整體嚟講，我覺得唔錯。」
巴塞隆拿嘅桑治就輸個馬鼻，喺最差收購排行榜排第2。桑治上季喺阿仙奴踢中場，防守唔錯之餘仲識助攻，但今季背負住1,900萬歐元嘅身價嚟到巴塞，似乎有啲水土不服；中堅同中場都踢過，但仲未搵到最佳位置。
棄將馬田斯搵到第2春
睇到呢個結果，可能唔少祟西貶英嘅球迷就會堂而皇之咁話，英超猛將嚟到西甲踢得差，全因為西甲水準高過英超好多！不過，被球迷選為第2最佳收購嘅，竟然係英超棄將馬田斯。呢位28歲尼日利亞球員踢過紐卡素同伯明翰，但表現唔算好，舊年以自由身加盟利雲特，今季13次聯賽上陣入6球，效率唔錯，搵到職業生涯嘅春天；而最佳收購就係由華倫西亞轉會巴塞嘅佐迪艾巴。
此外，美斯以6成選票成為最佳球員，而馬體會主帥施蒙尼就力壓摩連奴同哥迪奧拿，被選為最佳教練。