講起狼人、長鼻木偶同僭建嘅市民，大家係咪第一時間諗起狼振英呢？點知呢班同狼英係同類又有親嘅人士，噚日竟然齊齊上街反佢，大義滅親「幫理不幫親」咁話喎；亦有唔少市民製作創意道具，加入反狼行列，希望689特首，快啲早唞！
估唔到反狼英遊行，吸引到佢同類出席喎！業餘創作家、筆名「小孩子」噚日一身狼人打扮，除咗代表共產黨嘅綠色軍服，仲有狼人面具、689臂章、破壞核心價值嘅「雙金爪」，同大話連篇嘅長條鼻。狼人粉墨登場去咗遊行，吸引好多市民同佢影相，其間頭頂戴印有劉江華等庸官紙箱嘅大學生經過，狼人即刻喊：「我啲爪牙嚟咗呀！」
狼人現身 市民歡呼
狼人最鍾意擺嘅pose，當然係狼英嘅納粹手勢啦，一chok即時掌聲四起，個個市民爭住同佢影相，笑聲多過噓聲，同狼英現身差天共地。
狼人新年願望係自己快啲唔存在，香港快啲雙普選，直斥同類破壞香港規章制度同核心價值。狼人以前整過特大胡椒噴霧諷刺警權過大，製作過《麥兜洗腦腦教育》反國教，今次呢身裝束，只係用咗兩嚿水，好抵！
mailto:[email protected]