尋日係2013年咗嘅第一日，除咗好多人上街遊行，馬場一樣咁多人，話晒係新一年嘅第一日，你同我都想有個好開始，今日沙田馬場安排咗好多節目，有好運匙扣，又有得抽24K包金幸運金馬蹄，仲有糖妹、金剛、阿蘇做嘉賓，所以未夠鐘經已有好多人排隊等入場，結果入場人數打破咗99年元旦日賽馬嘅舊紀錄，就連陳南祿、任志剛佢哋都帶埋另一半入馬場過番個開心元旦！
尋日三T有成二千萬嘅多寶，直接拉高咗全日嘅投注額有成十三億，打破咗今季嘅紀錄，更係元旦日賽馬嘅新紀錄，結果三T三關大熱門都W晒，二千萬嘅多寶大家瓜分晒，真係皆大歡喜。
12屆冠軍騎師韋達俾潘頓追到平頭，自不然成為馬迷焦點，尋日佢兩個大打身價波，捧佢哋嘅馬迷自然滿意，但係韋達全日有啲當黑，跑嚟跑去都係得個P，去到尾場至贏番隻大熱，捧佢嘅Fans都算贏番粒糖返歸！反而潘頓就繼續咁旺，全日三W兼捧盃，其中兩W更係技術性擊倒韋達啦！
新嘅一年開始，唔知馬會嘅CEO應家柏有乜嘢新年新願望？
除咗馬迷想贏馬旺一旺，做馬主嘅就更加唔使講，事關每個月都要俾養隻費，贏番啲獎金幫補吓梗係最好不過啦，之不過尋日只係跑十一場，即係話只得十一位馬主食頭胡，佢哋贏馬咁開心，唔知大家又分唔分享到佢哋嘅喜悅呢？