回顧2012年推介股份，當中最靚仔莫過於9月份推介嘅天然氣設備服務股安東油田（3337）同宏華集團（196），至於舊年8月20日推介嘅雅士利（1230），其後亦有好表現，當日收報1.40元，去到11月30日升見2.33元，踏入12月開始回吐，年尾跌番去2.04元收市，但埋單賬面都賺45.7%。
點解12月逆市回吐？原因係佢計劃進攻高端嬰兒奶粉市場，增加變數。公司舊年6月底坐擁15.4億元（人民幣．下同）淨現金，換算每股淨現金超過7毫子，仲要經營現金流一直保持正數，原本計埋現金，估值抵到爛，但公司嚟緊將斥巨資押注喺新產品，現金隨時All or nothing。
雅士利喺11月中推出新嘅嬰兒奶粉，由新西蘭進口，學合生元（1112）打高端市場；之前公司亦向分析員表示，喺2012至2014年，將斥資13億元收購海外生產設施、成立豆類飲品產能同食品安全中心。
跌穿1.97元止賺
晉佳相信，雅士利高端奶粉做得掂，股價就一飛衝天，升到3蚊都唔嫌貴；相反，若銷路唔掂，淨現金見財化水，2013年市盈率就可能跌番去10倍樓下，即係股價低過1.75元。
市場一向厭惡變數，之所以雅士利股價由11月底高位2.33元，回落超過一成，美銀美林就賭雅士利打高端市場一定會輸，目標價得1.80元，評級跑輸大市。係咪輸硬？晉佳覺得好難講，話晒雅士利係中國頭三位國產嬰兒奶粉生產商，銷售網絡唔成問題，雅士利收購海外生產設施同成立食品安全中心，相信有助提升買家信心，但啲媽咪係咪真係肯畀BB飲，就要觀察落去；而投資者要見到回報，亦要有耐性。
雅士利近排股價有回穩迹象，如果閣下仲揸住，晉佳建議若股價明顯跌穿12月低位1.97元就止賺；冇貨嘅話，等股價明顯向上突破，反映春江鴨炒作高端產品銷售有成果，到時先分注向上溝都唔遲，策略上都係低過1.97元止蝕，升到3蚊先考慮獲利。
晉佳
本欄逢周一、三及五刊出