曼聯球星朗尼上周末留喺英國踢波，佢個老婆Coleen就唔理佢，同埋三歲囝囝Kai一齊去咗巴巴多斯度假，粗身大細嘅Coleen着住比堅尼，畀佢個大肚曬下太陽，而且佢仲唔怕動胎氣，同Kai仔玩到癲，扯起阿仔嚟fing，搞到阿仔成個人飛起，不知幾咁high。Kai仔後來好開心咁喺大水泡上面跳來跳去，但佢都有文靜嘅一面，跳完一輪後，佢啜住奶嘴戴住黑超，好留心咁睇住部iPad，Kai仔個樣好似日理萬機咁，係咪睇緊股市行情呀？