德國體操型男阮馬素（Marcel Nguyen）噚晚喺尖東麼地道倒數，再次吸引大批「粉絲」撐場，其中一位係香港倫奧體操代表石偉雄。石仔同Marcel經常一齊比賽，固然係競爭對手，但私底下都好老友。前晚石仔就盡地主之誼，請Marcel落中環蘭桂坊飲嘢，雖然天氣好凍，但兩人都盡興，型男點咗一杯紅牛伏特加（Red Bull Vodka），一邊飲，一邊傾咗個幾鐘，期間亦都有男、女「粉絲」認出佢，要求合照同簽名。
Marcel訪港之旅踏入尾聲，今晚6:00pm會喺屯門市廣場搞簽名會，係佢在港最後一場公開活動，各位「粉絲」好好把握黃金機會啦！