近期憑無綫劇《法網狙擊》人氣急升嘅森美，有周刊爆佢有戀足癖，喺社交網絡Instagram中上載近千張相，當中竟出現close up影長腿嘅照片，而索腿天后陳敏之更不時成為其模特兒，除咗有鋪戀足癖外，森美亦愛周圍偷影，街上母女行街都不放過，更特別愛偷影人瞓覺，似乎有啲缺德。
係笑話一則
雖然被講到似足變態佬，但森美噚日接受本報電話訪問就話唔怕影響形象，覺得係笑話一則，佢強調照片係公開，當中涉及影腳只係得約十張，而且女主「腳」都係拍嘢嘅對手，對方都知情，佢強調唔會因為咁而刪照片，亦都唔會避忌，佢話：「我係見構圖靚先影，唔係因為係腳先影，女仔好有美態，我就最鍾意睇眼，唔係特別影腳，而且有啲相要睇埋我嘅形容，好似有張影灣仔club門口嘅女仔，嗰日打風都要開工，希望帶出生活嘅苦，冇睇就會誤解，我都有影小儀隻腳，係覺得好笑先影。」佢今次被爆周圍影，最唔滿意就係佢老婆，佢自爆太太「哦」佢咪鬼再影。
黃國桐律師噚日就話性騷擾主要係有從屬關係先可以構成刑事，而森美事件就要因應番佢相片同埋形容詞會唔會惹人遐想先可以再作定論。
撰文：馮仁昭
