捲入澳門前任運輸工務司司長歐文龍貪污案嘅華人置業主席劉鑾雄，心情似乎冇受官司影響，噚日中午同女友呂麗君去灣仔福臨門午膳時笑容滿面，仲主動同喺外面守候嘅記者講，想發表一啲有關政治嘅意見。大劉話早前聽到新任中共總書記習近平提出反腐敗反貪污，否則會亡黨亡國，佢好堅決支持。不過，佢話希望中央唔只淨係關注內地嘅貪腐，希望要睇埋港澳特區政府。大劉言下之意，唔通佢親身感受到港澳兩地貪腐情況好嚴重？
對於大劉呢番疑似有弦外之音嘅說話，記者當然追問到底。大劉只係重複佢嘅睇法，冇詳細解畫，話最怕港澳有乜問題，唔知邊個去睇同去管，佢讚習近平係一個精明領導人，覺得中國有新希望。大劉又話呢番說話唔係有感而發，佢有好多嘢想講，要講可能要開一個60人嘅大型記者會，但係家唔方便多講。八方唔識解讀大劉呢番說話嘅玄機，但係香港特區政府係CY領導，假若香港政府有貪腐，CY肯定責無旁貸。