魚樂無窮:明年會更好 - 唐牛

魚樂無窮:明年會更好 - 唐牛

港股今年升逾兩成,相信大部份散戶(包括唐牛在內)都估唔到。無他,舊年歐債危機肆虐,股市跌足成年,股民信心盡失。不過,大市翻身唔代表有錢落袋,有調查顯示,今年有錢贏的散戶只有兩成,四成繼續交學費。結果唔算意外,今年中資股初段熱炒一輪後,歐債危機隨時爆發,恒指年中低見萬八,將散戶震得七七八八;往後歐美日大開水喉救經濟,本港金管局更頻頻向市場注資,股市重拾升軌,但唔少股民已聞股色變,眼白白錯過大升浪。
要數今年強勢股,非中港地產股莫屬,其中內房股倍倍聲咁升,有一兩隻傍身想輸都難;概念股就以頁岩氣板塊最威,唐牛今年多番推介嘅智能手機概念股如富士高(927)及嘉瑞(822),升幅亦以倍數計。
展望明年,A股成功築底,中資股肯定成為焦點,加上熱錢持續湧港,股市有望勝今年,希望嚟緊可以發掘更多好股畀大家,祝戰友新一年贏到開巷!

唐牛