近年唔少港股基金表現麻麻，遠遠跑輸大市，港股真係咁難玩？事實又唔係，晉佳聽唔少股友講，今年明顯叻過基金，贏到吓錢。
基金頻頻跑輸大市，原因有好多，首先，係基金經理同散戶之間嘅投資能力拉近咗。原本炒股唔叻嘅人，近年寧願買樓、買基金都唔買股票，剩番落嚟嘅散戶都係強者，平均分析能力亦比以前更強；與此同時，基金類別越嚟越多，基金經理數目增加，平均分析能力自然拉低咗，加上坊間資訊發達，基金經理優勢逐步減少。
第二，基金規模大，轉身唔夠靈活。近年普羅大眾多咗買基金，尤其香港人要買「強迫金」，基金規模越嚟越大，甚至大到好股、衰股都要買吓，以保持低現金水平，轉身自然唔及散戶靈活，基金持股票比例亦遠比散戶高，往往成為被宰目標。芬佬近年似乎取代咗散戶嘅角色，變成市場上被宰割嘅羊仔，間中同佢哋做對家，反而有着數。
假後補完貨 港股或見頂
晉佳講過，恒指9周RSI升到去70以上，中線進入超買區域，通常恒指出現周線圖超買調整，都可能有過千點嘅跌勢，如果投資者眼見港股連續兩日出現派貨迹象，就要小心股市短線見頂，到時可以減持股份。下個月頭基金經理放假番嚟，配合財政懸崖問題解決，有機會出現一輪短線基金補貨潮，當佢哋完成接貨，消耗購買力之後，港股就可能短線見頂，呢鋪真係有機會可以同基金做對家嘞。
至於A股，近排勢頭好勁，究竟係咪就咁見底一去冇回頭？晉佳相信A股已見底機會大，不過睇番2010年至今，內地A股呈慢跌走勢，同金融海嘯期間嘅急跌好唔同。喺慢跌嘅股市，一大特點係大戶要經歷儲貨階段，完成以前會出現幾次震倉，先出現真正嘅升勢。滬綜指近期由低位反彈近一成半，調整風險正在上升，下個月絕對有機會拖累港股。
總括而言，投資者短線要留意港股見頂徵兆，稍後再升就要預備出貨。
晉佳
本欄逢周一、三及五刊出