《城市論壇》講社會分化，曾被稱為「新民主女神」嘅黃大仙區議員譚香文（Mandy），都好想入場發言，點知遲到派晒籌，又冇人認得佢，保安咪唔肯放佢入去囉。「女神」下凡，但啲凡夫俗子視而不見，於是乎Mandy姐咪喺保安線外打電話，直接向港台投訴囉。一輪電話攻勢後，終於傳到主持謝志峰耳邊，開咪叫保安畀「黃衫女士」（佢當時身穿黃衫）入場。
到台下發言時，佢仍忿忿不平話幾乎俾人趕走，不滿攞唔到籌就唔准入嚟講嘢。謝志峰忍唔住插嘴：「係呀，攞唔到籌係唔入得嚟㗎喎」。「女神」隨即大呼冇言論自由。原來佢咁辛苦迫到入嚟都係為咗鬧爆特首：「梁振英特首個位係呃番嚟，香港市民擘大對眼睇啦，佢呃番嚟，冇誠信，係唔係應該叫佢落台！」