年終不妨放自己一日假，唞足精神明年再戰。馬後炮回顧一下，今年屬典型的牛二格局，大部份時間於萬八至二萬二關上落，消磨大部份投資者的意志，目的就是要收貨，至年底借QE3熱錢湧入，加上強國經濟確認復蘇，趁勢大幅掃貨推高指數。
近兩個月為升勢初期，會升到你唔信，因為意志薄弱的人都已離場，貨盡入強者之手，炒上自然冇阻力。初期資金仍未足以推高整個大市，主要跟隨國策等大方向炒作，故基建、頁岩氣、鐵路機械等炒到飛天，但資源、內需等板塊卻死下死下，如捉不準股份，會覺得仍然難炒。
近日資金先狂掃A股ETF，再炒內銀、內險及券商股，是推動中資股大翻身的迹象，展望明年，魏力認為仍是H股行先，本地股暫可不理，炒作概念主要有下列5個：農業化肥、新能源、內房水泥、券商及內需股。近兩周本欄已推介唔少相關股份，戰友不妨多加留意。
今年表現不過不失，偶有佳作如盈信（015）及景福（280），推介日分別最多升四及六成，有論壇股友形容魏力為「神經刀」，實不敢當，只屬巧合而已。明年魏力會繼續努力推介，與戰友於facebook fanpage多作交流，希望明年股市會更好！
魏力
http://www.facebook.com/2012jason