溫家寶要梁振英注意六大民生問題，第一項就係就業，香港失業率低，就業人數有366萬，何來就業問題？想落係溫家寶以心比心，佢知道中國每年要創造大量職位才可以維穩，故此就業永遠係中國施政第一優先，溫總同樣以為香港有就業問題。如果從居安思危嘅角度嚟睇，咁又冇錯嘅，任何政府、政權，最怕見到馬克思筆下之「失業大軍」出現，好似西班牙咁，失業率近25%，年青人失業率加倍，點搞呀！
想唔到香港年青人嘅失業率亦係整體失業率嘅4.4倍，現時整體失業率係3.4%，15至19歲少年人失業率係14.9%；20-24歲青年人失業率係8.4%，亦高出整體失業率近2.5倍，令人不解。何故不解？好多地方打鑼搵工人呀，硬係搵唔到，機場及港機工程已經為工人不足而頭痛啦。
好彩還有年青人肯做技術工人，十二月二十六日《蘋果日報》介紹一位23歲，來港三年嘅新移民，因會考英文肥佬，參加展翅計劃，後加入港機工程培訓後，正式獲聘任為維修員，月薪一萬三千元，薪水可能高過二十三歲嘅大學畢業生。如果年青人願意效法呢位新移民陳洲，失業率點會有8.4%-14.9%咁高呀？呢個問題值得經濟學者、社工學者深入研究，碩士生可用之作為碩士論文題目。
講居安思危，香港不能以為自己好發達，以後樣樣只講環保，保育優先、發展其次，甚至有人認為香港已發展過頭，呢啲嘢講到上頭，深入民間嘅話，香港可能慢慢成為威尼斯、曼徹斯特、利物浦以至衰到貼地嘅阿根廷，試看此三大城市嘅四百年盛衰史，以及阿根廷在第二次大戰後之衰落，由富裕國家變成第三世界，就知道世界地緣政治不斷改變，科技及國際貿易大勢隨時可捨香港而去，試看今天利物浦已無航運可言，曼徹斯特亦無紡織，就只剩番三支英超球隊；阿根廷無力還債，再加上政府干預，提高稅率，頹勢會一發不可收拾，聖誕前就有暴徒搶掠超市，殃及華人商戶。香港現遇上一個弱勢而要有為，喜歡干預相信干預嘅政府，十分危險。叻人強人搞干預都失敗居多，何況笨人弱人搞干預？