由cheap曾衰收尾走人，到狼英靠呃做咗「行騙長官」，充滿大話嘅2012年快將過去，趁大除夕最好送舊迎新，係時候諗吓一年之計，爽仔帶大家聽聽香港人對2013年有乜願望啦！ 吳爽
踢走大話精
聽日係元旦日，街頭巷尾都有人大叫：「梁振英下台！」皆因好多市民嘅新年願望就係踢走大話特首，最好拉埋佢最愛嘅劉江華一齊執包袱。工黨嘅何秀蘭話大話官員「快落」，香港人就快樂；而長毛梁國雄講明只要CY一日在位，元旦行完，七一會再上街，誓要踢走大話精特首，爭取全面真普選。
樓價快落
安居樂業係人民最基本要求，但狼英上台後只識用語言偽術治港，一方面喺新界東北割地賣港，一方面准白表買居屋政策推高樓價，連民建聯嘅TreeGun鍾樹根都呻買唔起樓，希望明年物業價格回落，等佢可以買樓送畀結婚嘅囡囡。
家吓地產霸權橫行，搞到劏房租金都貴埋，樓價回落係好多基層嘅心願，曾經瞓過劏房幾日嘅田北辰，寄語來年「政府做實事！」，相信係暗寸狼英唔好得把口，要實際聽民意去做事。
關注弱勢
香港號稱世界大都會，但人情並唔係薄過紙，有市民嘅願望係要求中共釋放劉曉波同朱承志。而4歲嘅Dora畫咗一幅畫，表達想非洲小朋友可以同家人住喺屋裏面，並且有書讀，即係同香港小朋友一樣咁幸福。環保觸覺嘅譚凱邦只係寫咗個「樹」字，希望香港有法例好好保護樹木，唔好話斬就斬。
思潮再起動
今年學民思潮一班年輕人成功令國民教育科擱置，家吓已經表明要求狼英下台，召集人黃之鋒話希望今年思潮再起動，再一次改寫香港歷史。查實香港年輕人好有想法，佢哋嘅願望有爭取平權自由、爭取真正言論自由，同時關心教育政策，仲想爭取學生搭巴士半價，減低學生哥負擔。
