J小姐傳來一張巴士及旺角地鐵站廣告圖片，一個男人，一隻小狗，廣告口號係「愛犬圖片，勝過千言萬言」，搞乜東東？WhatsApp一輪，先知道有廣告人要搵隻小狗拍廣告，剛好在「犬隻訓練所」見到J小姐隻狗，後經馴狗師（或訓練師，英文就係dog trainer）安排，隻小狗就成為「小狗明星」。J小姐平時湊隻狗，肉緊過人哋湊仔，有一次向公司請假兩天，以為佢故意配合長周末去旅行，誰知道就係為咗陪隻狗去訓練所，每次佢見到報紙新聞有關殺狗、虐狗新聞，就會嬲到面紅耳熱，同佢講「仗義每多屠狗輩」呢句古語，佢話完全唔識喎！左丁山心水清，問J小姐收咗幾多廣告費，佢話少到極，唔夠佢買對波鞋。左丁山睇真張廣告圖片原來係為W8賣廣告。哦，J小姐太過純真咯！人哋賺晒。
屠狗用來做乜？相信最終結局係將狗肉放進肚子內，香港直至1980年代，仍不時聽聞食狗之事，在新界有專門供應，50、60年代更到處都有，「香肉滾三滾，神仙企唔穩」，就係形容煲狗肉之香味四溢，誘人犯罪，旺角街坊對左丁山講過，有巡警聞香味而至，食客大驚，以為警察拉人，原來警察話深宵肚餓，聞香味而至，要分三六一杯羹啫。
食狗肉之風，因英國人憎惡，不斷取締，逐漸消失於市集，只新界有之（理民府尊重原居民傳統，包括村屋僭建及吃狗肉在內，對兩者皆抱隻眼開隻眼閉態度，唔似林鄭月娥咁打得）。一位來港已久嘅洋人，後調派馬尼拉，苦追大戶生意無功，後知一群華人大戶心思思想做「神仙企唔穩」，於是搵到佢嘅香港前任司機（新界原居民）安排好，一行六七人由馬尼拉回港，自啟德機場直奔元朗，食到飽一飽之後，次日早晨飛回馬尼拉，跟住奇蹟出現，洋人在馬尼拉為公司搶生意，得心應手，屢建奇功，得總部表揚，此已是三十年前舊事咯。
呢啲冚扮爛都係陳年往事，1990年代以後，香港極少極少聽聞有「龍虎鳳會」之事，市民養洋狗日眾，愛狗貓風氣大盛，打吓狗貓都會俾差人拉啦，何況吃之落肚？好此道者，去南韓咪得囉，唔好在香港搞搞震。南韓吃狗合法，因此飽受國際愛護動物組織壓力，但南韓以國情及歷史文化理由作辯詞，他日不知會否為韓人吃狗之古風向聯合國申遺，你點睇？