《蘋果》娛樂版最近加插了一段「舊聞」來影射今天的新聞，這邊廂當頒獎禮頒極唔完一百幾十個獎時，那邊廂重提譚校長當年喊咁口宣佈唔再領獎。畀機會新一代上位固然係用心良苦，但校長勢估唔到香港已經去到獎座多過人頭嘅地步，無人多謝你不特止，仲直接削弱咗當年兩頭馬車嘅精采程度；哥哥粉絲，可能係最唔想校長唔玩嘅觀眾。
美斯如無意外冇耐之後就會４連霸又做世界足球先生，係悶啲，之但係若果佢突然又話：「我有啲嘢想同大家講，我決定……唔再攞獎嘞！」咁你估係美斯fans傷心啲，定C朗fans心傷啲呢？咩呀，你唔攞，我哋C朗先有得攞呀？唔要呀，都唔矜貴嘅？獎，本身貴乎有競爭，而競爭，本來就係進步嘅原動力。
前兩晚渾身發冷又發熱，瑟縮在被窩時隱約聽到電台傳來的聲音，音樂情人鄭子誠，以前聽見會立即轉台，但那晚在磁性聲音陪伴下聽番31年前嘅龍虎榜 ─ ─ 當年龍虎榜第一位係阿B嘅《讓我坦盪盪》「處處旭日與斜陽，照到我的身上……」年尾流流確實很適合懷一個舊，令暈頭轉向的我安全感頓增，瞓得安穩。
潮流與懷舊，某程度有點年齡歧視，你話80年代好嘢啫，我未經歷過又點知呢？有朋友話邊個買咗Eason隻新碟就知你out唔out；係，買咗《重口味》嘅你就係out嘞！皆因隻碟係大懷舊，後生小朋友冇乜共鳴，咁又冇計喎，當權話事領導潮流嘅都係有過去的人，我哋愛懷舊你哋就要跟，所以我心諗那些專播舊嘢嘅經典台，其實好可能係專畀啲後生仔女惡補吓當年文化歷史，等佢哋容易啲接受家陣嘅懷舊潮流，瞓響床上嘅我攞住remote亂撳時，發現良心台好似有個新嘅數碼頻道coming soon，介紹話係播經典嘢，有冇《天蠶變》先？有的話隨時頂得住《天與地》重播喎，主題曲一樣咁掂：「獨自在山坡，高處未算高……」不如試吓硬撼吖，有競爭先有進步喎，不過真係唔使一日重播7次，大家都有錄影機噃，小朋友忍唔住加把嘴：「錄影機？乜嚟㗎阿叔？」
keyman
now TV主持
mailto:[email protected]