【投資往績】
相比起已打滾了超過30年光景的影壇，原來黃栢鳴與股壇更早結下淵源。惟他與股壇似乎有緣無份，他稱，一生人只有兩次炒股經驗，卻偏偏兩次都遇上大型股災。
自稱保持逢買必輸「佳績」的黃栢鳴，早於1972年已「盲舂舂」跟朋友學炒股票，「做緊洋行，有錢就身痕㗎啦，人哋話買股票咪買囉，嗰陣時遠東交易所就喺我寫字樓隔籬，我行過去就睇到『金魚缸』。」豈料他初次投身股海即遇上香港股票普及化後首次大跌市──「73年股災」，「點會諗到恒生指數由1700點跌到落150點，我就咁第一次瀨嘢！」
現已學精 不再沾手
經過第一次損手經歷後，黃栢鳴忍手長達14年，沒有再接觸股票。直至1987年，在身邊朋友慫恿下重出「缸湖」，怎料人生第二次炒股又碰上87年股災，不幸中的大幸是所輸不多，「呢啲都唔入肉嘅，我又唔喺瞓身，多餘錢嚟嘅。」
遇上兩次股災後，黃栢鳴亦已「學精」，明白自己不擅演出股民的角色而決定全身而退，更令他成功避開97、98年金融風暴，「我嗰陣冇買，仲喺專欄度勸人唔好買㖭！」