2012年在龍年效應下，娛樂圈逾30個龍B排隊出世，最富貴當然是趕上尾班車的劉鑾雄和甘比的慈姑椗，楊千嬅的6個月大囝囝Torres已經識轉身，陳慧琳的細仔「小龍包」劉琛則是一個開心BB，又肥又白的他抱到媽咪手軟。
撰文：丁寧
B仔Torres
出生日期：6月5日
媽Me：楊千嬅 爸B：丁子高
千嬅大讚半歲大的乖仔：「囝囝開始識轉身，仲哦哦學講嘢，同埋識得認人，知道邊個抱佢，Torres所有頑皮嘢我都覺得好可愛，因為佢真係好得意。」
B女陸一穎
出生日期：2月7日
爸B：陸永 媽Me：Rainah
陸永說：「囡囡比同齡BB高，佢最得意地方係唔畀我抱，唔肯要我，可能我太骨感抱得佢唔舒服，同埋佢唔鍾意玩具，最鍾意搶聽電話。」
B仔Kristopher
出生日期：6月11日
爸B：張崇基 媽Me：Mable
新秀出身、熱愛滑水的張崇基表示早已用音樂胎教囝囝，日後亦會用音樂栽培兒子成長，讓囝囝更有節奏感。
B女劉心
出生日期：7月20日
媽Me：谷祖琳 爸B：劉穎恒
雖然小劉心是早產B，但重7.3磅，還似爸爸一樣有大「的水」，出院當日撞正8號風球，可說貴人出門招風雨。
B仔Aleksander
出生日期：8月14日
媽Me：李樂詩 爸B：Ted Lee
唱作歌手李樂詩早已育有一子，今年再添龍仔，現重15磅的Aleksander深得李樂詩愛錫：「囝囝成個樣都似我，佢係好奇BB鍾意周圍望，唔開心就會叫，哥哥見到我抱BB會呷醋，平時就好錫細佬。」
B女陳禛
出生日期：10月30日
爸B：陳國邦 媽Me：羅敏莊
囡囡樣子似足縮水版媽咪，一出世就擘大個口，好似學媽咪唱歌一樣，十分可愛，難怪爸爸成日攬到實。
B女楊卓穎
出生日期：2月
媽Me：楊思琦 爸B：吳帥
楊思琦在美國未婚誕下女兒，她跟女兒的生父吳帥斷絕來往，回流香港，自己獨力賺奶粉錢養女，囡囡樣子似爸爸，而且頭髮不濃密，令思琦有點擔心。
B女周愛希
出生日期：10月3日
爸B：周永恒 媽Me：趙頌茹
愛希現重15磅，爸爸周永恒說：「囡囡越大越似我，眼圓圓，雖然只有2個半月，但已識認父母，其他人同佢玩冇乜反應，但我同媽咪逗佢就會笑。」
B女胡芷悠
出生日期：11月28日
爸B：胡諾言 媽Me：陳琪
胡諾言希望囡囡芷悠生活悠然自得，不要太大壓力，最緊要活得開心；BB通常都愛睡，但小芷悠卻相反，令父母很煩惱。
B仔Damiano
出生日期：11月5日
爸B：Dino 媽Me：Nancy
囝囝滿月當日，Dino剛完成新碟錄音，漏夜由深圳趕返港慶祝，Dino笑言自己照顧妻兒技巧純熟，可撈過界做陪月。
B仔Kyros
出生日期：8月3日
媽Me：姚嘉妮 爸B：林祖輝
姚嘉妮至今仍餵人奶，還戒食大閘蟹、芒果、燒鵝等對BB不好的食物，她謂囝囝肚餓時會喊得好大聲，還試過喊到聲沙。
B女Kylie
出生日期：5月22日
媽Me：郭羨妮 爸B：朱少杰
郭羨妮讚囡囡乖巧易湊，一覺睡到天光，不過前陣子BB冇便便令她好擔心，發覺原來BB有便便是很開心的事。
B仔杜卓霖
出生日期：2月16日
媽Me：何思諺 爸B：Mr.成員Tom
6個月大時已愛拍枱，還拍得很有節奏感，不知是否繼承了父親的音樂細胞，而且他看到人家跑步，手腳會不自覺郁動起來。
B女Jamie
出生日期：8月20日
媽Me：文頌嫻 爸B：李梓慎
囡囡樣子似足爹哋，文女產後情緒波動很大，她說：「自己冇經驗覺得好徬徨，個女喊我又跟住喊，結果邊喊邊餵奶。」
B仔Jean
出生日期：8月31日
媽Me：何嘉莉 爸B：黃逸璋
BB鼻、嘴都似爸爸，由於是家中第一個男孫，全家上下都超興奮，今年萬聖節，何嘉莉還將囝囝扮成跳跳虎，十分趣致。
