【厚此薄彼】
百佳分店長期霸佔走火通道作貨倉，原來因為舖內每寸地方都用來擺賣貨品，根本沒預留空間作貨倉。「我哋都冇計，根本冇倉，咁多貨都唔知放邊！」有分店經理無奈向記者解釋，「如果擺入舖頭，啲貨阻住通道，客人買嘢冇咁舒適，又會投訴，老闆又會詐型，我哋先焗住將啲貨擺出去」。
「我哋擺出少少都俾人鬧」
在石圍角邨經營電器舖的全港公屋商戶總會主席陳永成怒斥：「街市雜貨舖都有倉，幾千呎百佳竟然可以冇倉！佢哋（超市）由房委會到領匯年代，都係咁通街擺貨，我哋成日同領匯投訴都冇用」，陳甚至質疑「唔知領匯同百佳簽約時，係咪寫明佢哋可以咁樣擺貨」。
「領匯日日嚟影相，我哋擺出少少都俾人鬧，百佳就冇事，根本唔公平！」，在良景邨街市售賣雜貨的劉女士投訴，領匯職員每天到街市巡查，禁止店外擺貨，「我哋啲商販差唔多每間舖頭都俾領匯警告過，我見百佳啲貨擺到周圍都係，又唔見佢哋做嘢！」。
有商販及消防認為，根據現時法例及政府的做法，很難檢舉超市阻街及阻塞走火通道。持牌小商販協進會主席胡錦康直言，食環署即使巡查，也難阻超市在街上長期擺貨，「根本超市係霸佔公地，私用嚟做貨倉，但食環署到，佢（超市）即刻清走就冇事，更況且多數罰幾百，大企業點會在意。」
有消防員向本報指，就算超市長期在走火通道擺貨，消防處亦難以檢舉，「我哋嚟到第一次見到有雜物，會警告佢（超市），24小時內會再巡，但佢哋多數會執乾淨畀我哋巡，分局要等有人再投訴先會再巡，佢哋點會驚。」
《蘋果》記者