前幾年，劉德華拍咗套《未來警察》，港產片都大玩科幻元素，但睇劉華個look咁鬼似iron man嘅，難怪口碑好一般。咁人哋拍得好，參考吓都無傷大雅嘅，就好似印度Bollywood，最近都開拍套類似《阿凡達》嘅動畫，片名叫做《R-10》。點解叫《R-10》？因為佢哋搵咗朗拿甸奴做主角，而齣戲就預計2014年上映。
布力般流浪嘅印度班主Venky's集團除咗搞肉食生意，最近仲撈埋電影，斥資開拍《R-10》，仲簽咗朗拿甸奴返嚟做主角，話用佢個樣嚟整個外星人出嚟，而細哨仲會配埋音㖭。我求大俠mean啲講句，細哨個樣唔使加啲咩特別效果，都已經好似外星人，記得當年好多人話佢似《星球大戰》入面嘅渣渣兵（Jar Jar Binks）！
斥資開拍《R-10》
趁巴甲休季，細哨日前親自嚟到印度做宣傳，佢話：「我好開心俾電影公司揀中，呢個係新嘅嘗試，有大把嘢要學，但我家唔會透露齣戲嘅情節㗎！」Venky's隊波布力般呢排喺英冠好唔掂，一季炒兩個領隊，家都排喺下游，所以有記者問細哨會唔會1月去布力般幫吓手；佢先大笑幾聲，然後話：「喺未來，一切都有可能！但家我係明尼路嘅球員，會喺球會踢到2014年。」
話時話，套戲預計2014年上畫，就番巴西世盃個期，到時細哨約滿，話唔定宣傳新戲嗰時話埋加盟布力般，咁就大收旺場啦！