漫長嘅聖誕快車期嚟到球星們最難捱嘅第3回，爆冷戰果估計唔會比拆禮物日少，趁住今個周末起寒流又襲港；重心博倫敦「兩咸」之餘、應景再撐兩曼對家，擁抱嚴寒。
以前寫過幾年馬經，英超快車期密密打，就好似香港跑完夜馬，第二日又要刨過日馬咁，還好冇假放專注英超，通宵睇波後打稿仍樂在其中。回想上季拆禮物日後嘅一輪英超，可謂爆到七彩，去年12月31日除夕夜8場比賽，最震驚嘅係現已降落英冠嘅布力般作客曼聯，喺大部份時間領先下，為費Sir 70歲大壽當天「贈興」贏3:2；紅魔當日單W得1.06倍。另外車仔主場亦喺領先下1:3反輸維拉，後者爆出11.5倍客W，另有4場和波，僅阿仙奴同利記保熱W。以上證明喺密集戰兼濕冷地爛嘅「佳節」賽程下，表面實力高低變得唔明顯，開冷變常事。
處於困局，欣賞貝碧入波後扯高件波衫，露出大意叫「唔使騰，將個波交畀我。」呢位老江湖樂在球場打滾，放心叫隊友唔使騰可能深明富咸現時喺英超嘅實力，高不成低不就，唔使擔心近績稍回；起碼預咗雷丁同昆士柏長期墊底，放鬆點比賽，發揮會更佳。
上仗貼富軍贏修咸頓臨尾香被逼和，今續主場迎實力更強嘅史雲斯，稍換回賠率。主隊中場大腦拜仁雷斯傷後上仗半場換入，料戰力進一步回升；對手三線主力傷兵漸多，若射手米捷倦勤，這個上盤小弟堅持追多次。雷丁呢班英冠人腳，喺1月轉會窗前無謂再追，守得到但前線完全啞火；今場遇拆禮物日對阿仙奴場波改期而唞夠嘅韋斯咸，連卡頓高爾停賽都打甩，原本滿營傷兵獲天賜成個禮拜回氣，平手盤撐韋斯咸信起碼不敗。
今輪曼巿雙雄成為主客和最熱兩英超隊，冷敲對家良機至；曼聯上仗好彩反勝紐記但朗尼繼續倦勤，今場鋒線選擇少咗而守力一直存有大漏洞，對手西布朗今季換上領隊奇勒同樣輪換玩出彩虹，中後場守力遠比紐記硬淨，撐「客勝」望齊中。曼城情況差得多，兵多但無論西甲兵或南美人，似乎唔多享受喺呢個以前慣放假嘅佳節打波，作客敗走新特蘭後再要到擅於迎強隊嘅諾域治，再敗又何奇，文帥真係冇呃你，呢隊波正遇着big problem！文：蘋果波神
（下次見報日期：05/01）