報紙訪問港大法律學院陳弘毅教授講釋法與「暴風雨」，睇訪問先知道陳教授係昔年大會堂經理陳達文先生嘅公子，陳達文聞名文化演藝界，退休多年，現在恐怕冇乜人識佢咯。陳弘毅對釋法與「暴風雨」嘅睇法，與港大法律學院院長陳文敏及助理教授張達明有所不同，與政府觀點相近，或者有人唔喜歡，但大學教授最緊要有獨立思想，不朋不黨，不搞門戶門派之見，譬如近年學界與其他界別流行搞聯署聲明，勸捐籌款在報紙刊登廣告表達意願，呢類行動最緊要係自願，不受朋輩壓力而參加，不願參加者亦不會受到排擠及標籤，人人有說話，表達言論嘅自由，亦有保持緘默，不表態嘅自由，左丁山想起文革時代，人人要「表個態」，不表態就是反對毛主席，深惡痛絕，極不願見到「表個態」嘅行為在香港重現。
陳弘毅教授之法律觀點，左丁山並非法界中人，冇資格同佢辯論，梁家傑至有資格，但陳弘毅講到不問動機，只看結果嘅觀察方法，就好贊同嘞，呢個世界上有好多人好心做壞事，以為推出抑制樓市樓價可以得民心，但結果就係窒礙供應，推高樓價，對真正想置業之市民不利。睇遠啲，阿根廷政府提高稅率，增派福利，以為有益人民，誰知道搞到國家破產，部份壞人上街搶掠超級市場；委內瑞拉查韋斯搞民族主義、國家主義，國有化石油企業，趕走外國資本家，向貧民派糖，同時又修改憲法，等自己可以競選連任，意圖做終身總統，實際上當然係破壞委內瑞拉民主政制。凡此種種，都話係最初動機良好嘅，結果就係大災難。
小B自紐約傳來一篇文章，係2012年全美國最佳雜誌文章，就係《The Myth of American Meritocracy》（贏得2012 Sidney Awards），作者Ron Unz找出大量數據，指哈佛在1980年代，有15%學生係亞洲裔；因亞裔學生成績好，至1993年，此比例上升到20%，之後亞裔中學生嘅考試成績有升無跌，但哈佛嘅亞裔學生比例反而下跌，由1995年至2011年，始終徘徊在16.5%，而其他長春藤大學嘅亞裔學生比例，亦係16%左右，反之，猶太裔學生嘅比例仍然相當高，雖則猶太裔中學生成績一路下滑！我們不問動機，只看結果，就有理由懷疑美國精英大學排擠亞裔啦！