劉偉強和王晶這對最佳拍檔自《古惑仔》系列後，在電影上再無合作，但分久必合，最近王晶執導的電影《大上海》便反過來找劉偉強擔任監製。飲水思源，攝影師出身的劉偉強現在成為獨當一面的導演，他對睇住自己大的王晶依然心存感激，還有不變的是兩人近年雖多拍了合拍片，但實際從沒忘記港片，只要時機來臨即回歸拍港片行列。
撰文：文國駿
劉偉強、王晶及文雋早年合組最佳拍檔電影公司，拍過多部叫好叫座電影，但自2000年後眾人各自離開，自此在電影上再無合作，事隔多年，劉偉強和王晶最近再度在影壇聚首，合力打造電影《大上海》。
默契足不用磨合
《大》片導演王晶及監製劉偉強日前接受本報專訪，談到電影概念，王晶坦言08年已有此構思，惟第一稿劇本在審批上遇不少問題，要到今年的第五稿才通過審批。至於找劉偉強做監製，王晶不諱言看中他拍大片的經驗：「其實一落實拍《大上海》時已經知道呢套會係大製作，我呢幾年拍嘅戲都以中型為主，反觀劉偉強一路拍嘅都係大片居多，所以我知搵佢做監製一定幫到部戲，而佢都一口答應。」身旁的劉偉強聞言即連聲多謝晶哥給機會，他笑言：「晶哥可以話係睇住我大，其實監製王晶嘅電影呢個機會好難得，王晶拍過咁多部戲仲有乜嘢要人教？我監完王晶後真係監邊個都得！」王晶接着說：「我唔使人教，不過要人提！劉偉強可以將呢樣嘢做得好好。其實我同佢係好多年老友，雖然電影上十幾年冇合作，但私底下成日見，所以一埋位都唔使磨合，以前合作嘅感覺返晒嚟。」
王晶在影壇絕對算得上是劉偉強的前輩，在劉偉強仍是攝影師時，王晶已執導過多部電影，今次找劉偉強監製自己所執導的電影，可有奇怪感覺？王晶說：「完全冇，其實唔係話輩份高或者較有經驗就監製，輩份低就導演，只係兩個角色分擔嘅工作都唔同，又可以互相幫忙。我同劉偉強咁老友，兩個大男人乜都講得，要就住講就唔係老友啦！」劉偉強也笑言自己一入片場便「冇情講」，一遇不合的情況便會出聲。
笑周潤發似攝石
問到《大上海》最難拍的地方，二人異口同聲表示是南京路大爆炸的一幕，難度雖高但拍攝時出奇順利，劉偉強說：「我哋今次嘅爆破係搵番香港嘅劇組人員處理，其實可以話爭番一口氣，因為出面啲人成日話爆破最好嘅係美國人或外國團隊，我哋可以證明香港人係最好效率，拍爆破都好叻。」他續說跟晶哥及不少香港導演一樣，近年雖然以拍合拍片為主，但對香港電影那團火沒有熄，有機會就會再拍純港片，劉偉強肯定說：「我哋雖然拍合拍片，但都係用香港團隊，從來冇忘記過香港電影。」
談到多年未有合作的周潤發，王晶坦言發哥氣勢依然，他說：「周潤發做戲好，有氣勢唔使講，估唔到今次演員入面好似黃曉明、吳鎮宇同袁泉等都係佢嘅fans，一知周潤發做就二話不說應承拍攝，成塊攝石咁！」