【有血有淚】
黃埔居民苦水滿腹，2期懷疑冷氣僭建、5期地磚貨不對辦、7期電梯不經G層……，小業主多年來與管理公司周旋，一次又一次接管理公司律師信，成立法團又不成功，代表個個氣憤難平，希望藉今次爆渠契機團結居民，討回權利。區議員批評管理公司手持公契「以為自己大晒」，權力用到盡。
「問題核心係我哋根本冇制衡權，佢要我哋點就點。」居民林先生指，種種管理問題皆因屋苑無法成立法團，「只要有超過兩成業權人反對，我哋就搞唔成，淨係商場個業權都過兩成啦！就好似打Snooker咁，set死咗，真係好荒謬。」
林指現階段只能成立業主委員會，「咁樣令我哋處於極不利位置，因為呢個只係純粹諮詢組織」。該區區議員梁美芬批評管理公司不尊重居民，「好似揀清潔公司咁，居民示意佢揀A公司，點知佢最後又係揀番居民唔鍾意嗰間B公司。」她又指管理公司經常「告居民」，「管理費係邊個交㗎？居民吖嘛，咁大嘅集團有啲社會企業責任係好應該，唔好揸住份公契就以為自己大晒，權力唔好用到盡，要自我制約。」
《蘋果》記者