2012係選舉年，立法會變天，變得更紅更癲。政黨依舊由老人話事，功能組別繼續佢主場。所以話呢，政治呢家嘢，認真便輸了。不如聽住首Gangnam Style，睇住呢班議員2012年各有各style，反正香港經已沒有政壇，只有小圈子！
陳志全 同志是敢的
立法會史上首位出櫃嘅同志議員陳志全，着上彩虹戰衣將同志平權帶入議事廳，同志們趁機抬起頭來，連何韻詩都喺呢股浪潮中出櫃。同志果然是敢的。唔知性傾向歧視立法有冇希望呢？
范國威 顯高登力量
高登仔勢力抬頭，點能夠喺立法會冇代表。被譽為高登男神嘅范國威，前身係民主黨少壯派嘅骨幹成員，退黨保平安，殺出新血路。今年藉住反雙非，反赤化殺埋入立法會，彰顯高登果然有力量。
毛孟靜 無懼亞視瘋
眾所周知，經常反對大陸化嘅毛孟靜，最正斗當然係佢去亞視反發牌嘅現場踩場。Miss Mo與亞洲先生胸對胸，走過去同王征理論，高喊亞視「儍的嗎？」完全未驚過。
葉劉淑儀 有心唔怕遲
唔使十年，葉劉用九年就乜仇都報晒，由一個下台局長，到榮登行政、立法雙料議員。葉劉年初選特首嚟個「靚抽」，到早前笑死人話因為立法會太政治化，搞到病到開唔到會，句句都可以寫入葉劉語錄。
林大輝 大師講佛偈
自從唐唐敗選之後，大輝法師看破紅塵，向狼英拋下寸嘴佛偈：「昨天嘅因，今天嘅果，今天嘅因，明天嘅果，因果循環，報應不爽」。大輝冇耐即刻俾人照肺，睇怕呢啲唔係叫做報應，係報復。
張宇人 突襲玩剪布
即使廿蚊一粒鐘太刻薄，但業界都不知幾like佢，仲畀佢自動當選。做埋立法會財委會主席嘅佢，喺長者生活津貼中突襲剪布，但點解長毛會話，怪豬怪狗都不怪張宇人呢？
鍾樹根 黐筋Style
Tree根入咗「主法會」後，顛覆唔少四字詞，話叫高官下台等於焚書坑「孺」，唔存在等於「子烏虛有」，真係黐筋。各位港大同學仔唔好笑呀，呢位係你校董嚟㗎！
梁國雄 打救梁振英
唔理你係咪鍾意掟嘢、拉布、講粗口，總之長毛就係新界東票王！世界末日前，網民選咗佢做救世主，長毛最新任務係叫埋你元旦日一齊去「打救梁振英」！
蔣麗芸 獅吼震立會
九龍西嘅朋友真係命苦，四年前有鼠王芬代表你哋，點知今年送多件禮義廉元秋蔣麗芸入局，膽敢提出高官做錯事點使「炒魷」嘅妙論，真係令人看儍了眼。
曾鈺成 主席吹黑哨
剝奪市民選舉權嘅替補機制，激起泛民拉布還擊，最後曾鈺成吹黑哨「剪布」喝停。黑哨曾從來唔簡單，政治野心勃勃，單睇佢年初突然話要選特首就知啦。
黃碧雲 爆累街坊
白鴿黨主席個位本來已係囊中物，但最終都得唔到，都係怪一嚿雲「撳錯掣」累事啦，佢仲要爆鬧新民主同盟係民建聯B隊，結果搞到要道歉，真失禮。
田北俊 撕破狼面具
四年前揚言退出政壇嘅田北俊回歸立法會，繼續做「建制扭計派」，田少早前「良知」感召，逼到狼英吐咗一句「我冇講過我冇僭建」，讓香港人見識到語言偽術嘅高超境界。
李卓人 嗌到口都乾
既係支聯會、又係工黨頭目嘅李卓人，一邊嗌最低工資33蚊，一邊嗌平反六四，但每個數字口號，都係得個嗌字。最近佢仲搞埋標準工時八個鐘，超時補水倍半㖭。
mailto:[email protected]