憑無綫劇《On Call 36小時》飾演醫生而成為宅男女神嘅張慧雯，上月25號晚因涉嫌藏毒被警方拘捕。
張慧雯噚日下晝到上水警署報到，佢喺爸爸、大律師盧敏儀及無綫經理人陪同下，喺4點15分坐七人車抵達警署。化晒妝嘅張慧雯冇帶黑超遮樣，反而大方笑住任影唔嬲，佢逗留至下晝5點左右離開，但已木無表情。
死撐扮冇嘢
馮仁昭打電話畀張慧雯，問佢有冇被警方檢控？佢猛話：「暫時冇，冇事啦。」係咪警方唔會檢控？佢話：「梗係冇啦。唔方便講太多，有需要會再協助警方調查，唔想妨礙司法公正。」講到入警署時笑晒口，張慧雯話只係死撐。不過警方發言人噚日向本報記者透露，張慧雯係獲准保釋外出。咦？咁即係並非張慧雯所講冇事啦。
事發當日警方截停一架出九龍嘅超速客貨車，搜出約值8,000蚊嘅大麻花，張慧雯同姓羅嘅男司機一齊被捕。噚日問張慧雯被捕男司機點情況？佢話：「唔想講太多。」
撰文：馮仁昭
