我係由1989年開始入市的好友，親身經歷過之後的升跌。我見過好多人衰，我仲生存到，係因為1997年7月全面掟貨，至能保存元氣。我仲轉埋行，唔再做AA（地產代理），因為預計入息會大跌。
之後，好多戰友破產、走佬，甚至燒炭。到2004年至敢入番市，其間，忍咗七年。
由2004年至今，個浪差唔多十年，我客觀分析，個市仲有得升，所以我仲hold貨。但我時時自我警惕，花無百日紅，個市遲早衰，我一定要在衰落前跳船，所以我好留意突發事件，2008年金融風暴，雖然表面上大大鑊，但我唔驚。2010年年頭，我仲加碼。2010年年底推額外印花稅（SSD），我都唔驚。
但今年賣車位，我就有啲驚，因我睇過貨，呢批貨係唔得，唯一好處係「細細粒、容易食」。如果呢批車位有好下場，即係話個市crazy，正如股票牛市尾期，雞犬升天，我會好似97年咁全面掟貨。
好好彩，呢批車位真係仆咗！即係個市未crazy，個市仲係理性，我就繼續hold貨。唔好問個市幾時跌；我在1997年7月全面掟貨，但我在1997年6月仲有入貨。
uandme（摘自香港討論區）
本欄園地公開，歡迎各界來信，以450字為限，
請電郵至mailto:[email protected]，
註明《家》樓民講場，請留聯絡電話。編輯保留文章的刪減權。