樂壇第一份成績表—《新城勁爆頒獎禮》前晚圓滿結束，仲破紀錄派發163塊肥豬肉，差唔多「人到禮到」，但班歌手都好似前世未攞過獎咁鬼咁興奮，乜啲獎真係咁珍貴？
話說1988年，阿倫譚詠麟同張國榮兩個玩晒，兩幫粉絲鬥到你死我活，仲出埋人身攻擊，搞到佢兩個好尷尬。早出道嘅阿倫仲領先哥哥半個馬鼻，喺頒獎禮始終佔上風，但佢出席第十屆《十大中文金曲頒獎音樂會》嗰陣，突然喺台上宣佈話以後唔再攞獎，只會頒獎，亦成為樂壇第一位宣佈唔攞獎嘅歌手。
當時阿倫話唔想同後輩爭食，想將機會留番畀後輩，咁樣樂壇先可以百花齊放喎，亦有人估佢驚俾哥哥爬頭，所以喺最光榮一刻勇退，擸埋個尾彩嘛。
後來四大天王嘅張學友、黎明同郭富城都宣佈唔攞獎，先至造就陳奕迅及古巨基呢批後浪囉。姑勿論當初阿倫究竟嗰刻諗乜，佢唔攞獎對樂壇始終有貢獻㗎。
撰文：阿Wow
