新盤悶場，但房協開盤卻相當熱鬧。「置安心」項目綠悠雅苑開示範單位，坊間反應不錯，連日來除吸引年輕客參觀外，亦有不少為子女睇樓的家長客到場。示範單位內櫳實用，部份睇樓客參觀時，已盤算着如何在長廳間多一房，如此看來，自用買得過，但若抱投資心態，置安心絕對不適合。
記者：葉淑貞
五十餘歲的伍先生剛與太太參觀示範單位，他坦言無意申請，純粹好奇，「自住都OK嘅，不過我覺得就算用家都唔需要太心急，2016至2017年之前，會有好多資助房屋推出及落成，個價可能都係咁上下，仲有啟德地皮都有政府樓，如果青衣區唔係咁啱心水，就等等囉。」他非常冷靜地分析，但就抱怨房協沒有預備足夠的樓書，時為周六，「下晝兩點幾已經冇樓書和價單，只得申請表。」
限制多 難賺住又賺價
綠悠雅苑入場費246萬元起，有人話貴，有人話抵，但實用程度還是得到一致好評，絕對比所謂「精品型」好住，但投資則是兩回事。始終，置安心是以市價為計算基礎，只是給予折扣，想賺住又賺價，還要睇四年（兩年建築期、兩年轉售限制），限制多多難以靈活走位，抱投資心態必然輸多贏少。唯一着數是物業免按揭保險，2015年入伙才上會，若到時市況大逆轉，買家可選擇撻定，房協不會追差價，相信這就是投資者「至安心」的地方。
綠悠雅苑由銷售、管理費都以實用面積計算，官方平面圖還加入量度面積，交樓標準一如私樓，設計口味年輕化，附送的珍寶分體冷氣、TGC爐具及抽油煙機、TOTO面盆等，屬較實惠的熱門牌子；複合橡木地板、防火板廚櫃亦是大路耐看型，同類型全屋裝修家電估計要逾30萬元。
【申請備忘】
申請日期：2012年12月28日至2013年1月18日
抽籤公佈：2013年2月底
揀樓日期：2013年4月中
官方網頁： http://www.greenviewvilla.com.hk
【示範單位逐個睇】
A. 實用面積535方呎
兩房單位 佔近八成
項目主打兩房，佔77%（760伙），實用面積535至550方呎。房間都有大窗台，但面積尚算合理，第3座E室為單邊位，可優先考慮。兩房索價310.3至386.3萬元。
【供款小計】
樓價：350萬元
按揭：九成
利率：2.3%
年期：30年
首期：35萬元
每月供款：12121元
B. 實用面積448方呎
一房單位 客廳闊落
一房戶有152伙（佔15%），實用面積420至450方呎，售價由245.9至307.7萬元。一房大門直入廳區，無走廊位，故客廳比起兩房還闊落，可惜廁所無窗。示範單位展出的是「大一房」，而細一房（即420方呎）主要是客廳較短，缺點是工作平台與鄰居的工作平台相連，只以鋼條相隔，又是屬於「同隔籬屋借鹽」的睦鄰之選。
【供款小計】
樓價：280萬元
按揭：九成
利率：2.3%
年期：30年
首期：28萬元
每月供款：9697元
《蘋果》網民洗版
Dennis Cheung：
香港人就係咁，永遠唔知世界變咗，成日連「房協」同「房委會」都搞唔清，搞得清又以為房協仲係1948年嗰時的房協，唔知佢家只係着咗黃馬褂的地產商。
Nelson Lo：
房協賣多幾次這樣的樓盤，便富可敵國啦；這1000個單位，平均每個400萬（元），便可賣到40億（元），好賺過大多數地產商。如果用喺重建或起更多單位便是好事，但政府隻字不提，賺幾多？會點用？
Mok Po On：
政府多些幫人炒樓的政策，皆大歡喜，好過起完公屋，又要想辦法去起多啲居屋來吸引班公屋的人搬走。