前港隊隊長吳偉超周初突然宣佈同太陽飛馬解約，回歸中甲，效力天津松江，響球圈引起唔少迴響；超仔就話決定重返中甲踢波，除咗香港球迷少，令佢冇動力外，本地球壇各方面都同國內球壇有落差，所以寧願辛苦啲都返去踢。求大俠聽完，總結講句，香港足球過去10年冇進步過！
吳偉超01年見港甲球市每下愈況，所以返國內發展。雖然中國足球喺亞洲唔算頂級，但從中甲踢到中超成為首位登陸中超嘅本地球員，仲踢過亞冠盃，就算未捧過盃都算威過。兩年前，阿超喺29歲嘅時候重返港甲，諗住趁仲當打，為香港球圈做番啲嘢；點知同想像有好大分別，就算鳳凰計劃上埋馬，原來乜都冇改善。
「冇動力留響香港」
同松江簽咗兩年約嘅超仔話，離開多年，以為本地球市有好轉，點知原來大部份賽事都只係得幾百球迷，踢過最多球迷嘅比賽，已經係上年省港盃首回合。
球迷少之餘，最大件事係甲組隊設施等配套都唔掂，甲組隊日日只可以響仿真草場操個半鐘，球員知會踢傷腳都冇符。超仔話，喺香港練波經常要去唔同場，仲要一夠鐘就俾場地職員趕走，覺得自己完全唔似踢職業波；而中超同中甲球會都有固定訓練場同宿舍，兩者的確差好遠。
下個月初就要向松江報到嘅超仔話：「今年31歲，仍然算當打，相信有能力應付較高水平嘅聯賽，今次加盟天津松江條件確實比留響香港好，但會辛苦好多；仍然堅持上去踢，條件唔係首要考慮，係因為冇動力留響香港，希望今次返去可以操起狀態。」
中甲獎金豐厚
話就話條件唔係重要考慮，但中甲正選球員月薪有5、6萬人仔，加上獎金吸引；好似上屆中甲冠軍上海特萊士，上季每場波獎金3、40萬人仔，連勝仲會累積，爭6連勝嗰場波就有60萬。計計吓，正選球員贏一場分到2、3萬，多過港甲一線球員成個月人工，作為職業足球員，有好條件走人梗係無可厚非啦。