【隔牆有耳2012大事回顧】
本來，2012年，香港一早有雙普選。結果，呢一年，700萬人嘅國際城市，689人選咗個狼振英做特首；立法會70席，功能組別似乎想千秋萬代。人權、自由日日縮窄；荒誕鬧劇日日新鮮。舉高雙手，着起黑衫對抗劣政，彷彿係香港人喺2012指定動作。
政府乜都唔聽，洗腦教育要強推、新界東北要強拆；同佢理性講道理，佢玩語言偽術。於是乎，民間社會喺今年創造咗唔少肢體語言。新政總出現過幾十萬個反國教大交叉高呼「撤回」。新界東北發展，數以千計村民做出Ｔ字手勢要「擱置」，唔要狼英割地賣港。
電訊魔童王維基想做免費電視小魔怪，但政府唔show佢，搞到魔童要藝人做出公仔箱四方手勢。民建聯投票只跟阿爺意思；議事堂內，葉國謙繼續對泛民提出嘅動議、修訂倒豎拇指，等保皇黨跟隊咪投錯票。不過點都唔夠狼英經典，當選一刻個疑似納粹手勢，論驚嚇度佢贏晒！
mailto:[email protected]
