當施政報告仍未埋尾、政務司與常秘做到一頭煙之際，梁振英竟然放假去日本玩，有否搞乜錯，同樣肩負今次草擬重任嘅波哥，又放埋假，現政府梁營人馬，真係能人所不能。政府施政舉步維艱，大部份係自己造成，而最主要原因係「粗疏」二字。
處理政事粗心大意
無論上至梁振英，下至張志剛、邵善波等梁粉，表面上從政多年，過渡期開始已為北京出謀獻計，而回歸後梁振英也晉身行政會議多年，但成班人都冇實際操作經驗，連一份似樣嘅新聞稿、演辭都未知點寫，更無從分辨好與壞。
梁振英比林瑞麟稍稍優勝之處，係有些少感情，但只係不同型號嘅「人肉錄音機」。而此等業餘政客之盲點係處理政治事務粗心大意，用內地官場術語係「欠過細」，唔重視執行細節。無論你有幾高「戰略思維」，假如連一個立法會演辭都唔識處理，咪又係一名得把口嘅吹水怪。
業餘政客另一特色係認為講咗就當做咗，以為講完一切會自然出現，所以最愛發email畀人，以為收到電郵就一切順利執行。至低能係連起用高靜芝組織「政治詮敘科」一事，都用電郵通告問責團隊，變相公告天下。
政治工作同工藝差不多，最重要流程管理，一個好的政策意念，構思過程中如何buy in公務員，令他們自覺有份參與，有責任令政策成功出台，並監督執行成果，一切皆始於buy in過程。業餘政客未覺察自己嘅業餘性，所以一旦出錯，有失誤就諉過於專業官僚，認為佢哋不服從政治班子，暗中搞破壞及抵制，故回歸以來兩大利益集團鬥爭不絕。
今次梁振英在施政報告埋尾關鍵時刻去放假，究竟是過於自信，以為可大安旨意，抑或係以為講咗當做咗，好快有答案。如果出台後無法提振民望，政策建議甩甩漏漏，就代表佢根本能力問題比品格問題更嚴重。
添馬男