湯唯爸爸、石窟畫家湯餘銘昨日首次在香港大會堂舉行畫展，湯唯特別向劇組請假，到場支持。湯爸爸期間感動下淚，湯唯坦言受爸爸影響愛藝術，但作為女兒，小時候真不了解爸爸四處出遊畫畫的舉動，現在才明白畫畫是爸爸的生命。
湯唯昨日現身中環，為68歲父親湯餘銘的畫展站台，露面支持。湯唯全程傍住爸爸，一齊做儀式，在台下又不停與來賓合照，其間主禮嘉賓講到湯爸爸如何艱辛作畫，展現真善美時，湯爸爸感觸下淚。
「作畫係佢生命」
特別向劇組請假的湯唯說：「最近喺哈爾濱拍電影《黃金時代》，好凍呀，零下32度，一出門口眼睫毛上面就結咗冰，好誇張，不過都好靚。」湯爸爸在場落淚，湯唯也表示意外：「係，第一次見佢感動到喊，我都唔信佢係呢種（感性）人。
「細個時，經常見到佢畫畫，畫到凌晨兩三點，除咗畫畫，就係畫畫，好搞笑，有時佢有朋友打電話嚟屋企，問爸爸去咗邊，我都唔知道，要打電話畀佢，先知佢去咗山西、河南，原來作畫就係佢嘅生命，作為女兒，sorry，我以前真係唔太了解。」
湯唯指家人都希望她從事美術、繼續畫畫，但最終她走上戲劇之路，但爸爸的影響仍在：「我經常發夢會夢到爸爸嘅畫，喺大山大河大自然中，人真係好渺小。」湯餘銘畫畫多年，90年代開始，拿着畫具遊走新疆、敦煌、印度，被一個個佛教石窟的造像感動，一面寫生一面修行，畫石窟畫了十多年。
鄺美雲導男友
同場還有虔誠信佛的鄺美雲，她指經朋友介紹認識湯餘銘：「好莊嚴、歡喜，畫佛係一種功德，但我唔識畫畫，只會抄經。」活動後她趕去法會，豈非沒時間陪男友林達民？她說男友會陪去，但從沒強迫男友信教：「佢以前冇信仰，我屋企有好多佛書，佢睇吓睇吓覺得好有道理，先一齊去。」
採訪：盧妹
攝影：林德雄
