現年39歲嘅蔡少芬（Ada）早前好開心咁喺微博宣佈陀第二胎，之前佢喺佈道會自爆過生楚兒之前曾經流產，估唔到今次有第二胎，胎兒同樣差啲不保。
下體流血不止
噚日有消息指Ada喺上星期一個佈道會度分享，話今年10月尾，佢帶埋囡囡搭飛機時唔舒服，入洗手間後發現自己下體流好多血，當值機師畀Ada緊急落機，老公張晉就飛車入機場陪老婆入醫院。醫生話Ada胎盤出現一條大裂痕，搞到下體大量出血，Ada激動咁話如果唔係有小產經驗，佢會癲咗。不過，之後Ada交代BB家好健康，當時瞓咗兩星期醫院。Ada的經理人噚日係電話中話﹕「問咗Ada，證實冇事，大家放心。」
Ada仲喺佈道會透露十幾廿歲洗腳唔抹腳嘅瘋狂歲月，令人聯想起多年前與劉鑾雄嘅緋聞。大前日聖誕節，Ada喺微博上載咗一家人開心慶祝合照，Ada話：「今天是主的誕生，願你們每一個好好享受這個美麗的一天！」佢哋仲整埋人形曲奇餅，預埋未出世BB一份。噚日張晉又喺微博晒溫馨，楚兒錫咗爸爸面珠一啖，張晉當然冧爆。
撰文：馮仁昭
