每年大行都會就明年大市作預測，暫時睇得最好的是瑞信，恒指目標為27000，相對現水平有兩成升幅。今年港股升23%，即明年重複相同升浪。不過，普遍大行未必如此樂觀，本欄選出6間大行，平均目標為24833，僅高於現水平9.8%，算是收斂。
大行審慎 明年睇24833
朋友見年底港股炒得興起，再見這些樂觀預測便情緒高漲，問高明是否信得過。要解答此問題，必須走入歷史。
大行曾對2011年充滿憧憬，平均目標達29136，最牛的法巴更睇32000，高盛、大摩亦逾29000，因為前一年剛推出QE2。可惜，年尾埋單，恒指低收18434，平均跟現實相差近六成。由於大行齊齊嚴重估錯，亦導致同年底冇行敢出預測，押後至今年首季才陸續出現2012大市預測。
2011年全城盡「燈」，變相令2012年預測變得審慎，大行平均目標為22183，跟現價比竟然只有不足2%的誤差，瑞信誤差亦不足4%。值得留意，法巴目標為20000，誤差達12%，又成為最差，可謂左一巴、右一巴。
總結：今年跟2010年背景相近，同樣有QE，若信宿命，法巴今年會再「燈」，明年大市冇運行。但整體而言，明年預測不算好大喜功，亦有去年往績支持，今年的恒指預測，本欄傾向相信。
高明