前排晉佳估港股中線差唔多見頂，似乎估得早咗些少，好在未有叫讀者即時沽貨。睇日線圖，恒指仍呈慢升格局，未有派貨迹象，暫時可以持貨見步行步，直至見到雞犬皆升時，先部署散水。
恒指9周RSI升越70，的確反映呢浸升市接近尾水，不過近日唔少二三線股醞釀爆上，尾水呢一浸，睇嚟會係短炒時機。
既然炒到尾水，短線揀股睇圖好過睇基本因素。近年嘅例牌龍尾股儀征化纖（1033）亦開始爆升，噚日漲5.5%至1.92元，正式進入一浪高於一浪嘅形態。呢隻股前排突破1.80元左右嘅頭肩底頸線，成交逐步增加，前兩日輕微回吐，股價回到去頸線變為支持，噚日爆上，算係後抽後再突破嘅首日，強勢應該剛剛開始，睇量度升幅，頸線以上起碼有4毫子，即係閒閒哋可以上番去2.20元，中短線仲有十幾巴仙空間，配合港股中線升浪末段佢先發力嘅個性，短線睇嚟的確係Juicy嘅選擇。
明年首季睇2.49元
如果睇中長線嘅周線圖，儀征自2010年至今，喺1.50元附近形成咗鐵底，最高曾經喺2010年下半年升到去4.61元，而今年3月至今，走勢圖形成咗一個圓底，10月中突破周線圖保歷加通道中軸1.60元之後，直至11月下旬一直守得穩中軸樓上，走勢轉強，近幾個星期開始上升，但累積升幅唔夠兩成，成交逐步增加，中長線肯定未升夠，照計出年首季可以上試3月高位2.49元。
如果睇儀征基本因素，最簡單係睇棉花價格，因為佢主要產銷聚酯產品，係衣物用料，屬於棉花嘅替代品，所以儀征股價中線都跟隨棉花價格。
由11月到家，棉花價格由低位每磅70美元，升到去每磅77美元左右，如果炒環球經濟回穩，棉花價格中長線有機會上番100美元，但要升到去2011年初嘅瘋狂高價200美元樓上就有啲困難，所以中線揸儀征，暫時都唔好睇到去4.61元嗰啲亢奮價，睇番2.50元比較穩陣。
晉佳
本欄逢周一、三及五刊出