何偉強，48歲，人稱「奸仔」，傷殘團體「路向」探訪團成員、無音樂伴奏小組團長。10歲時證實患類風濕關節炎，病情惡化，影響頸椎神經致四肢癱瘓。病魔纏繞，更遇慈母病逝，灰色人生卻因一班同路人找回色彩。月前他透過安達旅運贊助，與八名輪椅戰友展開郵輪之旅。自嘲是最酷的輪椅兵團，邊走邊唱，為亡母為自己，承諾活得更好。記者：呂麗嬋
「香港人，最鍾意去旅行，但對於我哋輪椅一族，唔好話去旅行，想去樓下買個麵包，一啲都唔易。但不良於行，係咪代表一定慘過鬼，只可以透過屋企個細窗望天打卦？咁又未必。10月時，我就同另外八個同樣四肢癱瘓嘅輪椅老友記，去咗台灣高雄一轉。同你一樣，嘆媖鳳梨酥、坐喺甲板吹媖海風。原來坐喺輪椅看世界，一樣美麗動人。
我哋呢團人，個個都要坐復康巴士。晨早去到海運碼頭上船，連埋照顧我哋嘅工人姐姐，仲有幾個駐團醫護，一行20幾人。一般人去旅行拖個小篋，我哋嘅行李就係吊車、呼吸機同電動輪椅充電器。
喺船瞓咗一晚，抵達高雄。接待我哋嘅係當地嘅傷殘團體，上岸食媖台灣小食、逛市集，最估唔到嘅係仲有美女團歡迎我哋。不過，最難忘係船長歡迎酒會，人人要扮靚靚出席。我哋一行九個戰友，好多都未試過踏出香港，出遠門，戰戰兢兢，擔心身體出狀況，又怕隨行設備失靈，顧慮多多。
好在六日五夜嘅行程有驚無險。好多仔女會帶阿媽去旅行，我會諗，如果我都可以帶阿媽嚟玩，你話幾好？自10歲發病，媽媽一直係我抗病嘅動力。因為佢嘅堅持，先有今日嘅我，我欠佢好多。阿媽成日同我講，童年嘅我好乖，打針、食藥，從冇扭計。其實好細個我已經知，只有咁先有機會康復。
老友助解鬱結
可惜好多嘢事與願違，咁多年，我學識咗接受。最難過反而係媽媽為咗照顧我，心力交瘁。喺媽媽離開後嗰幾年，我一直想放棄自己。好在有班儍佬成日嚟醫院探我。我都叫做死剩把口，佢哋有啲連吸啖氣都要靠機器。大家都有一段傷心嘅過去，都曾經問過個天：點解係我？大家傾媖講媖，仍然獨個兒生活，又好似冇咁孤單。
受佢哋影響，我漸漸開朗起嚟，仲加入成為探訪團嘅一分子。天上嘅媽媽救咗我一次，呢班老友又救咗我第二次。今日嘅我依然坐喺輪椅，有時仍會問點解，但我唔再抑鬱，坐喺甲板望住嗰海，我仲希望越走越遠。正如冇音樂伴奏，死剩把口亦唔錯，一樣可以唱出好聽嘅歌，係咪？」