【電視風雲之企硬博炒】自稱香港良心電視台的亞視因藝員缺席演藝訓練課程而炒魷懲處，課程今日復課，有人屈服但亦有人堅拒妥協，亞視就安排傳媒參觀授課，曾曠課的蒲進暗示授課導師未夠班，亞姐大家姐黎燕珊則力撐娘家，認為上下溝通有問題，願擔橋樑角色。
亞視演藝訓練計劃因炒了戚黛黛等四人成為焦點，並順從意見將課程改為星期一、三、五上課，並於今日復課，為增透明度，亞視安排傳媒到場採訪，今日會由高志森任導師。曾上過堂但拒再出席的蒲進昨返大埔亞視總台跟高層葉家寶傾談半小時，態度繼續企硬：「我覺得冇必要，我支持公司開班，但有必要斟酌課程程度，我向來唔搞事、唔做新聞。」蒲進強調平心靜氣與高層交換意見，可擔心被炒？他笑言：「擔心都冇辦法，除非佢答我個問題，我讀過無綫訓練班有羅冠蘭、詹瑞文做導師。」蒲進明顯暗示亞視導師未夠班。
黎燕珊撐要改革
黎燕珊、羅霖、姚嘉雯、張家瑩及許瑩等昨到亞視出席《ATV 2012亞洲小姐競選》大中華總決賽的謝師宴，之前有上課的活動司儀蔡國威表示不清楚會否再炒人，承認合約中的1.1條文列明有演藝訓練。黎燕珊則表示沒聽過會再炒人，並認為是溝通不足：「我知公司要改革、拍劇，新人上堂學嘢係好，我做導師分享應付傳媒幾唔開心都要笑，藝員同高層應多溝通，我願意擔此角色。」
有上課的姚嘉雯坦言為上足堂沒人工加而不開心，她謂未聽過會再炒人，並謂高層鄺凱迎及葉家寶都叫他們放心。張家瑩直言：「我哋好聽話唔會亂炒。」她又盲目撐亞視說：「上堂係圍繞亞視歷史，我做主持學呢啲啱，廣博啲。」許瑩請病假缺課，居於深圳的她也怕來回太操勞，可擔心被炒？她說：「自己做到位不會輕易被炒，亞視有人性化管理。」
採訪：葉雪
攝影：黃偉雄
