近年樓市㷫烚烚，唔少名人藝人都買樓作投資，就連1996年為香港摘下奧運第一金嘅「風之后」李麗珊都唔例外，兩年幾前佢同家族成員夾份用咗1669.9萬買咗個鴨脷洲南灣海景單位用嚟收租。個單位有成1338呎，望遊艇會海景。
1338呎沽1808萬
華華聽講，呢個單位放租咗一排仲未租出，起初每月租金嗌3.8萬，市場冇乜反應，最終今年4月搵到租客，月租微調至3.5萬，不過唔知珊珊係咪俾政府啲辣招嚇窒，有消息話佢最近已經用1808萬賣咗個單位，呎價1.35萬，雖然係市價，但係扣埋釐印費同佣金，大概只係賺50幾萬銀，唔通想套現換貨？珊珊老公兼代言人黃德森話唔知老婆賣樓嘅事，要親自問過珊珊至知喎。