呢排真係holiday mood，啱啱聖誕先放完兩日假，返埋今日又到星期六日，加上元旦，唔少打工仔索性趁機自製悠長假期，有啲打工仔會呻：「放完長假返工最辛苦。」但原來唔少人都真係咁諗喎！
抵得諗但冇薪加
人力資源顧問公司Robert Half訪問咗100間公司嘅人力資源總監，有58%受訪者話打工仔放完長假，要兩日先可以回復狀態；29%話甚至要三、四日。咁咪差唔多成個星期都未回魂？
不過都唔係個個鍾意大時大節嘅，因為既然有人放假，就有人要執人手尾，自然會多咗工作量。嗰啲抵得諗嘅同事咪好唔抵？Robert Half香港區總監安柏菲就話，要獎勵呢啲勤力嘅員工，例如畀佢哋放多啲假，又或者公開表揚佢哋。但係就冇建議加人工喎，唔通個巿真係仲未好番？